Մինչեւ ոստիկանապետ Վահե Ղազարյանի Ներքին գործերի նախարարի պաշտոնում նշանակվելը, ՔՊ-ականները հույս ունեին, որ Փաշինյանը նորաստեղծ այս կարեւոր կառույցի ղեկավար կնշանակի իրենցից մեկին։ Հատկապես լայնորեն շրջանառվում էր Արտակարգ իրավիճակների նախարար, ՔՊ վարչության անդամ Արմեն Փամբուխչյանի անունը։
ՔՊ-ականների սպասելիքները հօդս ցնդեցին, երբ Փաշինյանը Ներքին գործերի նախարար նշանակեց Վահե Ղազարյանին, իսկ վերջինիս տեղակալներ Արման Հովհաննիսյանին՝ ՀՀ ոստիկանապետ, Կամո Ցուցուլյանին՝ ԱԻն փրկարար ծառայության տնօրեն։ ԱԻ նախարար Արմեն Փամբուխչյանի անունը, որքան էլ տարօրինակ է, չկա անգամ Ներքին գործերի նախարարի տեղակալների թվում, իսկ տեղակալների պաշտոններն այլեւս թափուր չեն։
Արտակարգ իրավիճակների նախարարությունը դեռեւս 4 ամիս կշարունակի գոյություն ունենալ՝ այս փոփոխությունների ընթացքը, ինչպես Փաշինյանն է ասում, անցնցում ապահովելու համար։ Եվ Արմեն Փամբուխչյանը դեռեւս չգիտի, թե պաշտոնանկությունից հետո Փաշինյանն իրեն ի՞նչ պաշտոն կառաջարկի։
MediaHub-ը հետաքրքրվեց Փամբուխչյանից՝ ինչո՞ւ Ներքին գործերի նախարարի պաշտոնը Փաշինյանը տվեց Ոստիկանապետին, վիրավորված չէ՞։
«Ոչ մի խնդիր չկա նրանում, որ ես չդարձա։ Կան որոշակի հաշվարկներ, ըստ այդմ, վարչապետը որոշում է կայացրել, որի հետ ես ամբողջությամբ համերաշխ եմ։ Ինչի՞ համար պիտի նեղված լինեմ: Հայտարարել եմ, որ պիտի իմ ջանքերը ներդնեմ այդ կառույցի կայացմանը»,-ասաց նա։
Հարցին, թե չորս ամիս անց, երբ Արտակարգ իրավիճակների նախարարությունն ամբողջությամբ լուծարվի, ի՞նչ պաշտոն է ստանձնելու, ասաց, որ չորս ամիս անց այդ թեմայով քննարկումներ կլինեն։
Մանրամասները՝ տեսանյությում
Լիա Սարգսյան