Վարչապետ Նիկոլ Փաշինյանը վաղն աշխատանքային այցով կմեկնի Չեխիայի մայրաքաղաք Պրահա: Այցի շրջանակում տեղի կունենա Փաշինյանի, Ֆրանսիայի նախագահ Էմանյուել Մակրոնի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի քառակողմ հանդիպումը:

Նույն օրը Պրահայում նախատեսված է նաև Հայաստանի վարչապետ Նիկոլ Փաշինյանի և Թուրքիայի նախագահ Ռեջեփ Թայիփ Էրդողանի հանդիպումը:

Փաշինյանը կմասնակցի նաև Եվրոպական քաղաքական համայնքի գագաթնաժողովին:

Այսօր Ազգային ժողովում Նիկոլ Փաշինյանը, խոսելով Պրահայում նախատեսված հանդիպումների մասին, նշել է. «Հիմնական հանդիպումները կլինեն սրանք, այս ուղղություններով, որն, ըստ էության՝ ընդհանուր խաղաղության օրակարգի քննարկման մեջ է տեղավորվում»։

Խաղաղության օրակարգը ենթադրում է ազգային կոնսոլիդացիա, մանավանդ, որ որևէ մեկը չի կասկածում, թե Հայաստանին սպասվում են ցավոտ լուծումներ:

Ի դեպ, դա խոստովանում է անգամ Նիկոլ Փաշինյանը, սակայն ազգային կոնսոլիդացիայի փոխարեն՝ ակնհայտորեն էսկալացնում է Հայաստանի ներքաղաքական կյանքը:

Օրինակներ՝ ինչքան ուզեք:

Փաշինյանը կարող էր ինքը նախաձեռնել փակ հանդիպումներ՝ նախկին նախագահների մասնակցությամբ, կամ որևէ այլ ֆորմատով, որը կնախատեսեր ընդդիմության մասնակցություն: Նա չգնաց դրան, փոխարենը՝ գերադասեց նախագահների հետ շփման հեռակա ձևը՝ «դեղին մամուլի» «սլիվների» մակարդակով:
Ժամեր առաջ, Փաշինյանը «խրոխտ» ելույթ ունեցավ խորհրդարանում՝ բավականին խոցելի փաստարկներով քննադատելով Ռոբերտ Քոչարյանի ու Սերժ Սարգսյանի ղարաբաղյան քաղաքականությունը:

Ինչո՞ւ է Փաշինյանը ներքաղաքական էսկալացիա հրահրում:

Պատճառները մի քանիսն են:

Նիկոլ Փաշինյանը պարտության համար շարունակում է մեղադրել բոլոր արտաքին ու ներքին սուբյեկտներին՝ իրենից բացի՝ հույս ունենալով խույս տալ պատասխանատվությունից:

Մյուս կողմից, Նիկոլ Փաշինյանը շարունակում է ներքաղաքական իրավիճակի էսկալացիային միտված հռետրորաբանությունը՝ թերևս հույս ունենալով, որ այդ ճանապարհով կարող է խուսափել Ադրբեջանի հետ պայմանագրի ստորագրումից, ծայրահեղ դեպքում՝ նպատակ ունենալով պայմանագրի պատասխանատու դարձնել քաղաքական այլ սուբյեկտների:

Վահրամ Բագրատյան