Դրամի փոխարժեքը՝ այսօր
Եղանակը՝ այսօր
Քաղաքականություն

Բաքվի նոր պահանջը ու Երևանի խղճուկ պատասխանը

Blog Image

Անցյալ շաբաթ պարզվեց, որ Ադրբեջանի իշխանությունները նոր պահանջ են ներկայացնում Հայաստանին:
Ադրբեջանի նախագահի օգնական Հաջիևը ասել է՝ Երևանը ութ գյուղ պետք է վերադարձնի Բաքվին։ «Բանակցությունների ընթացքում ադրբեջանական կողմը բարձրացրել է Ղազախի շրջանի յոթ գյուղերի և Նախիջևանի մեկ գյուղի հարցը, որոնք մինչ օրս օկուպացված են», - ասել է Հաջիևը։

Ադրբեջանցի պաշտոնյաների հայտարարությունների համաձայն՝ Բաքուն նկատի ունի Տավուշի մարզի Վերին Ոսկեպար, Ներքին Ոսկեպար, Բաղանիս Այրում, Խեյրիմլի, Սոֆուլու, Բարխուդարլու, Ղըզըլհաջըլը գյուղերը և Արարատի մարզում գտնվող Տիգրանաշեն՝ նախկին Քյարքի գյուղը։

Պաշտոնական Երևանն, ըստ էության, չի հերքում կամ կտրուկ չի մերժում Բաքվի պահանջը:

«Անկլավների հետ կապված հարցերը դեռ պետք է քննարկվեն Հայաստանի Հանրապետության եւ Ադրբեջանի Հանրապետության միջեւ պետական սահմանի սահմանազատման ու սահմանային անվտանգության հարցերով հանձնաժողովի ու Ադրբեջանի Հանրապետության եւ Հայաստանի Հանրապետության միջեւ պետական սահմանի սահմանազատման պետական հանձնաժողովների համատեղ աշխատանքների ընթացքում»,- ասված է Հայաստանի ԱԳՆ պարզաբանման մեջ:

Այսպիսով՝ Բաքուն օրակարգ է վերադարձնում, այսպես կոչված, անկլավների թեման ու ինչպես տեսնում ենք՝ Հայաստանի իշխանությունը չի փորձում հակազդել դրան: Մինչդեռ, Նիկոլ Փաշինյանն ու մյուսներն ամիսներ շարունակ մեզ «հեքիաթներ» էին պատմում այն թեմայով, որ եթե Արցախի կարգավիճակի հարցում «նշաձողն իջեցնենք», Հայաստանի տարածքային ամբողջականությունը երաշխավորված է:

Հայաստանի իշխանությունը Արցախից «ձեռքերը լվացրել» է, բայց Բաքվի «ախորժակն» ավելի է բացվել՝ ադրբեջանական զորքերը չեն հեռանում Հայաստանի տարածքից, Ադրբեջանը պահանջում է անկլավներն ու միջանցքը:

Ահա, թե ինչի է հանգեցնում Փաշինյանի պարտվողական քաղաքականությունը...

Վահրամ Բագրատյան

Send